A OPA hostil do BBVA ao Sabadell, á mesa do Consello de Ministros, por Maite Cancelo

O Ministro de Economía tomou a decisión de elevar a opa hostil do BBVA ao Banco Sabadell ao Consello de Ministros, que terá 30 días para decidir se se para, se tramita coas condicións impostas pola CNMC ou se endurecen os compromisos para autorizar a operación.

Despois da polémica consulta pública lanzada para apoiar a súa decisión, cuxos resultados aínda non coñecemos e sobre a que pesa un recurso contencioso-administrativo por carecer, segundo o despacho que a presentou, de cobertura legal e con defectos formais graves (como a non identificación do usuario). Cuerpo esgrime razóns de interese xeral distintas da defensa da competencia, como serían a protección dos traballadores, a cohesión territorial, obxectivos de política social e a promoción da investigación e o desenvolvemento tecnolóxico.

O certo é que a operación tería o apoio do Banco de España e da propia Unión Europea xa que as fusións xeran economías de escala, ganancias de solvencia (que as fan máis fortes ante as crises) e maior capacidade de competir nos mercados internacionais.

Con todo, esta fusión tería impactos sobre a competencia, ao reducirse o número de entidades no territorio e outros riscos que tamén apuntaba a CNMC e que levou á elaboración dun documento de compromisos asumidos polo BBVA.

En Galicia, aínda que ningunha das entidades ten a súa sede na comunidade autónoma (aínda que o Sabadell mantén o nome de Sabadell Gallego), as principais entidades bancarias con presenza relevante son Abanca, CaixaBank, Santander, BBVA e Sabadell. A fusión de BBVA e Sabadell consolidaría aínda máis o proceso de concentración bancaria que se vén producindo desde a crise financeira de 2008, o que pode provocar unha menor competencia nalgunhas áreas, sobre todo en zonas rurais ou semiurbanas. Esta redución de actores podería traducirse nun menor dinamismo na oferta de produtos e servizos, así como en condicións menos favorables para particulares e pequenas empresas.

Como noutros territorios, un dos efectos máis inmediatos pode ser o peche de sucursais para eliminar duplicidades, especialmente en cidades como A Coruña, Vigo, Lugo e Ourense, onde ambas as entidades teñen presenza física.

As pemes e os autónomos tamén se verían afectados se o novo grupo fusionado decide reestruturar a súa estratexia comercial e centrarse en perfís de clientes máis rendibles ou grandes empresas. Isto podería dificultar o acceso ao crédito ou endurecer condicións para moitas pequenas empresas galegas.

Pero unha redución de competencia por parte do BBVA-Sabadell podería abrir unha xanela de oportunidade para Abanca, o principal banco con sede en Galicia. Esta entidade podería captar clientes descontentos coa reestruturación, especialmente se mantén unha rede de oficinas ampla e aposta por un trato personalizado. Abanca podería reforzar a súa posición como entidade de referencia local, o que tería implicacións en termos de marca, negocio e emprego.

En conclusión. Aínda que Galicia non é o centro operativo de BBVA nin de Sabadell, a OPA tería efectos indirectos relevantes sobre o sistema financeiro galego. A fusión podería implicar unha menor competencia, a perda de emprego en banca, o peche de oficinas e un acceso máis difícil ao crédito para pemes. Con todo, tamén podería crear oportunidades para bancos locais, como Abanca. En todo caso, o impacto final dependerá das decisións estratéxicas que adopte o novo grupo fusionado e do grao de supervisión que exerzan tanto as autoridades reguladoras como a Xunta de Galicia para mitigar os efectos negativos sobre a economía e os cidadáns galegos.