A OMS, alarmada pola magnitude e rapidez do gromo de ébola no Congo
A Organización Mundial da Saúde convocou o Comité de Emerxencia tras detectar 500 casos sospeitosos e contabilizarse 130 mortes vinculadas, supostamente, á transmisión do virus
REUTERS/Victoire Mukenge
O director xeral da Organización Mundial da Saúde (OMS), Tedros Adhanom Ghebreyesus, dixo hoxe que a "magnitude e rapidez" con que se propaga o gromo de ébola na República Democrática do Congo (RDC) é alarmante, con máis de 500 casos sospeitosos e 130 mortes que tamén se cree vinculadas á transmisión do virus.
O responsable anunciou que convocou o Comité de Emerxencia, un grupo internacional de expertos que asesora á OMS, que se reunirá ao longo do día e formulará recomendacións para conter este gromo.
A forte mobilidade da zona favorece a expansión do virus
Os casos reportáronse sobre todo en centros urbanos, como Bunia, a capital da provincia nororiental de Ituri (RDC), e na capital de Uganda, Kampala, onde houbo dous casos, incluída unha morte, relacionados co brote no veciño país.
Ademais, faleceu persoal médico que atendeu os afectados, o que indica que houbo transmisión nos centros sanitarios.
O director da OMS recalcou que a gravidade deste brote está relacionado coa forte mobilidade na zona, dunha parte polo conflito armado reinante, que forza á poboación para desprazarse, así como pola actividade mineira, con xente que vén e vai, co risco de propagación que isto implica.
"A provincia de Ituri é altamente insegura, o conflito intensificouse desde finais de 2025 e os combates aumentaron fortemente nos últimos dous meses, o que resultou en moitas mortes civís. Máis de 100.000 persoas convertéronse en novos desprazados, e no caso dun gromo de ébola, sabemos o que isto significa", sinalou.
A organización global conta cun equipo sobre o terreo que está a prestar apoio ás autoridades nacionais para responder á situación, alén das subministracións e equipos que enviou.
O actual gromo epidémico na RDC ten a particularidade de que está causado polo virus Bundibugyo, unha especie do virus do ébola para a que non existen vacinas nin tratamentos.
Por primeira vez, un director da OMS declarou -este domingo- unha emerxencia de saúde pública de preocupación internacional sen reunir antes o Comité de Emerxencia, o que é posible tras os cambios realizados ao Regulamento Sanitario Internacional tras a pandemia de covid-19 co fin de axilizar as medidas e a coordinación internacional.
