A OMS advirte de que aparecerán máis casos de varíola do mono
A OMS advirte de que aparecerán máis casos de varíola do mono
A Organización Mudial da Saúde advirte que aparecerán máis casos de
varíola do mono a medida que a vixilancia se estende en lugares non endémicos.
Nos últimos dez días detectáronse preto de cen contaxios nunha ducia de países, entre eles España. Polo momento, o maior número de positivos concéntrase en Madrid. O conselleiro de Sanidade, Enrique Ruiz Escudero, informa dos datos.
"Son 30 positivos e 40 sospeitas, son os datos que temos a día de hoxe. Agora é importante encontrar a rastrexabilidade de todos os casos , conseguir os illamentos e intentar frear os contaxios"
Os expertos en saúde pública inciden no illamento dos infectados. Manteñen que a transmisión do virus se produce mediante fluídos, cando hai un contacto físico estreito. Explícao Patricia Guillem, catedrática de Epidemioloxía da Universidade de Valencia.
"Estes líquidos poderían ser dende o sangue a outro tipo de fluídos, fluídos sexuais e os propios fluídos que produce a enfermidade sobre a pel, sobre todo pequenas vesículas como ocorre coa varíola"
As autoridades sanitarias permanecen vixiantes ante a propagación do virus entre persoas que non viaxaron a rexións de África onde a varíola do mono é endemica.
En Aragón estudan o primeiro caso sospeitoso. Trátase dun home que estivo en contacto con outros confirmados.
Xa son oito as comunidades, entre elas Galicia que detectaron posibles infectados. En Gran Canaria prosegue a investigación dun festival despois de que se vinculara cunha serie de contaxios en Madrid, Tenerife e Italia.