A Garda Civil destapa o encubrimento dun mozo que conducía ebrio e sen carné
Tras sufrir un accidente en Teo, os ocupantes do coche cambiaron a identidade da persoa que ía ao volante
A suposta condutora saíu ilesa malia que o habitáculo quedou esmagado, o que levantou as sospeitas de Tráfico
Ambos os dous están a ser investigados por estafa á aseguradora, falsidade documental e delitos contra a seguridade viaria
O Grupo de Investigación e Análise de Tráfico (GIAT) da Garda Civil de Galicia investiga un home e unha muller por orquestrar un engano tras un sinistro viario ocorrido no municipio de Teo.
Os implicados tentaron ocultar a identidade do verdadeiro condutor para eludir a acción da xustiza e estafar a súa compañía de seguros. Os feitos producíronse o pasado 20 de marzo na estrada DP-0205.
O turismo envorcou tras saír fóra da vía e o habitáculo do condutor quedou completamente esmagado. No lugar dos feitos, catro persoas declararon que a condutora era unha muller que, sorprendentemente, non presentaba nin unha soa rabuñada.
Esta "incongruencia lóxica", sumada ao excesivo tempo que tardaron en avisar aos servizos de emerxencia, puxo en alerta á Garda Civil. Tras unha exhaustiva investigación e toma de testemuños, os axentes confirmaron que no coche só viaxaban tres persoas e non catro.
O grupo pactara unha versión falsa para encubrir o verdadeiro condutor: un mozo que carecía de permiso de conducir por perda total de puntos e que, ademais, tiña unha taxa de alcol de 0,52 mg/l (máis do dobre do permitido).
Ao tentar atribuír a responsabilidade do accidente a unha persoa que non conducía, ambos os dous foron postos ao dispor xudicial como presuntos autores de varios delitos contra a seguridade viaria, falsidade documental e estafa, en grao de tentativa, contra a aseguradora.
