A festa da ameixa roxa da Illa, algo máis que un encontro gastronómico
O club de ximnasia rítmica Arousa organiza este evento para recadar fondos para as súas actividades
Nas carpas montadas no porto do Xufre, na illa de Arousa, hai mesas para acoller ao redor dun milleiro de comensais. Desde o venres celébrase a festa da ameixa roxa. Cociñáronse 500 quilos de ameixa en distintas preparacións e outros produtos. Todo local, adquirido na lonxa.
"Ven de aquí, si, da lonxa que compramos aí. É todo produto local aínda que é verdade que o mar non está como ten que estar e o marisco escasea pero nós temos para que veña todo o mundo e gocen coa comida", salienta Ainhoa Boullosa, vogal do club de ximnasia rítmica Arousa.
A escaseza fai subir a cotización do marisco, pero a organización preferiu manter os prezos nun niveis asequibles para todos os petos. Esta non é só unha festa gastronómica. Organizada polo Club de ximnasia rítmica Arousa, con 35 nenas e nenos inscritos, nela colaboran maiores e pequenos.
"Estou de cociñeira, fago tortillas, ademais hai filloas, paellas, ameixas á mariñeira e con fabas. Hai de todo e non é moi caro", di Lolita Outeda, avoa dunha pequena ximnasta.
"O tempo non axudou moito pero houbo xente e queremos que veña máis. Con estas festas, axudamos as nenas do club durante todo o ano a sufragar os gastos das viaxes e todo o que conleva a actividade do club", explica Ainhoa Boullosa, vogal do club de ximnasia rítmica Arousa.
Esta noite aínda están a tempo de achegárense a cear. E, se non lles cadra, a fin de semana vindeira, fan a festa do polbo con distintas preparacións e prezos tamén razoables.
