A feira Fóra Stock! de Boiro quere demostrar que tamén o comercio pequeno ofrece ofertas

Non só fan rebaixas as grandes superficies comerciais. Nas vilas, nas tendas de toda a vida tamén é posible atopar gangas. En Boiro organizan ata o sábado unha feira chamada Fóra Stock!.

Hai nove anos que Boiro converte as tendas físicas en postos de feira e saca á rúa o xénero da tempada de verán que xa remata. A Fóra Stock! é unha cita cos descontos do comercio local, o de proximidade. 

Tamén hai edicións de saldos no inverno en Boiro. Uns vinte establecementos ofrecen descontos durante estes días. Ata o sábado. As ofertas estarán á vista, na rúa. Pero tamén no interior dos comercios que participan. 

Boiro convértese nun gran centro comercial aberto, pero coa esencia da atención entre veciños. E a prezos rebaixados. Ademais de roupa e calzado, o escaparate da feira inclúe sorteos e actividades de lecer.