A erosión do mar pon en perigo unha urbanización construída a pé de praia en Barreiros
O paseo marítimo de San Bartolo terá que ser recuado, para o que será necesario expropiar parte da zona axardinada do bloque de vivendas
A urbanización construída hai 30 anos na praia de San Bartolo, en Barreiros, encóntrase agora en perigo.
A erosión do mar fixo que se acurtase a distancia que separa o bloque de vivendas da liña costeira, tal como advirte un estudo xeotécnico realizado polo Servizo Provincial de Costas.
O informe sinala que para garantir a estabilidade da urbanización vai ser necesario recuar o paseo marítimo.
Para iso, haberá que expropiar parte da zona axardinada do bloque de vivendas.
Ademais de recuar o paseo, o proxecto contempla tamén suprimir os miradoiros e deixar o areal sen accesos, tal como se encontra, por seguridade, dende hai cinco anos.
