Zapateiro, un oficio en extinción
Cada vez hai menos zapateiros, e iso que a reparación de calzado é un servizo con elevada demanda
En toda a provincia de Ourense apenas quedan unha vintena deles, máis da metade concentrados na cidade
Hai comarcas enteiras que non dispoñen deste servizo
Mingos colleu o relevo cando se xubilou o último zapateiro de Verín. Antes, había cinco pero todos foron pechando. Agora dálle servizo a unha ampla contorna.
Domingo Álvarez "Mingos", zapateiro: "Véñennos da zona de Viana, da Gudiña, de Sanabria. Incluso veñen ao hospital de Verín e, no tempo que veñen ao hospital, reparámoslles os zapatos".
A carga de traballo obrigouno a buscar axuda. Agora ten un empregado que, máis ca iso, é un amigo. Pedro, un antigo camioneiro reciclado en zapateiro.
Pedro Álvarez, zapateiro: "Este choio é bricolaxe. Hai que ser mañoso. Por moito bricolaxe que sexa, hai que ter coidado de non estropear os zapatos".
Reméxense en poucos metros cadrados repletos de instrumentos. Reparan bolsos e cintos, pero o negocio principal está no calzado.
"O que máis facemos é cambiar tapas, pegados, cosidos... Tráennos bastantes bolsos. Tamén cambiar cremalleiras", explica Mingos.
En toda a provincia de Ourense quedan unha vintena de zapateiros e a maioría están na cidade.
