A empresa galega de ostras afectada polo brote en Hong Kong di que orixe está por determinar
Mariscos Escacha di que hai polo menos outras tres posibles orixes implicadas na investigación, entre elas Corea do Sur, Francia e Irlanda
Engaden que aínda non recibiron os resultados oficiais das analíticas, polo que piden non chegar a conclusións prematuras
Hong Kong detén a venda de osras dunha empresa galega por intoxicación
A empresa Mariscos Escacha, S.L. asegura que a investigación sobre a orixe do brote de intoxicación alimentaria en Hong Kong segue aberta e aínda non se determinou a orixe exacta das ostras relacionadas cos casos reportados, polo que reclama "rigor e prudencia" e non chegar a conclusións prematuras.
Despois de que as autoridades de Hong Kong ordenaron a suspensión da importación e venda de ostras crúas producidas por esta planta procesadora do Grove, desde a empresa aclaran, nun comunicado, que as ostras "están a ser actualmente analizadas polas autoridades competentes".
Segundo explican, polo menos hai catro posibles orixes implicadas na investigación, entre elas Corea do Sur, Francia, Irlanda e España" e, polo momento, aínda non recibiron os resultados oficiais das analíticas.
A investigación segue aberta e, polo tanto, aínda non se determinou a orixe exacta dos casos reportados, insisten desde a empresa, que exporta semanalmente máis de 15.000 unidades de ostra ao mercado asiático, polo que alcanzou, no período de investigación dos 37 casos de intoxicación rexistrados, entre o 1 e o 12 de febreiro, unhas 25.000 unidades.
Así que especifican que miles de consumidores inxeriron as suas ostras nese mesmo período sen reportar ningún tipo de malestar.
A empresa conta con máis de 13 anos de experiencia exportando ostras e mexillóns ao mercado asiático, "sen que se rexistrara previamente ningún caso de intoxicación" vinculado aos seus produtos, reiteran desde a compañía, que resalta o seu "compromiso constante coa calidade, a seguridade alimentaria e a confianza" dos seus clientes internacionais.
Ademais, lembran que a planta de depuración e expedición está sometida a controis oficiais dos inspectores da Xunta de Galicia e do Ministerio de Sanidade, quen realiza todas as verificacións necesarias para a emisión dos certificados sanitarios de exportación correspondentes e a empresa opera "baixo os máis altos estándares de boas prácticas e rastrexabilidade".
A compañía reitera a súa plena colaboración coas autoridades competentes e a súa absoluta confianza en que a investigación permitirá esclarecer os feitos con obxectividade e rigor científico.
