A descarbonización do sector aeronáutico abre oportunidades para as empresas galegas

A boa posición das industrias galegas no sector dos drons abre a porta a novas oportunidades na aeronáutica. Fernando Sánchez Troncoso, director de I+D de AIMEN explica que "as tecnoloxías duais para defensa e aplicación civil supoñen unha importante oportunidade para Galicia".

O cambio dos combustibles fósiles por outros menos contaminantes e a procura de aeronaves máis lixeiras son algúns dos proxectos que lidera o centro tecnolóxico de AIMEN no Porriño. "A introducción de motores eléctricos, a incorporación do hidróxeno supón un monton de oportunidades", destaca Sánchez. 

Un proceso onde será clave o traspaso de coñecemento e tecnoloxía ás empresas. Salvador Romero Esteban, enxeñeiro principal de investigación de GKN Fokker Aerospace, apunta que grazas a "AIMEN pode que outro tipo de empresas se unan ao tirón da aeronáutica".

Unha revolución que vai máis alá dos fabricantes de aeronaves e compoñentes. José María Rodríguez, project manager de CT Engineering Group, detalla que necesitan posicionar "toda a cadea de valor, dende os fabricantes principais de aeronaves ata empresas de enxeñería e soporte para introducir estas tecnoloxías que van permitir a descarbonización do sector".

Estes días AIMEN reúne no Porriño 120 expertos europeos no sector para debater sobre a fabricación sostible.