Publicador de contidos

Publicador de contidos

A concesionaria do transporte urbano de Ourense non se reunirá este venres cos traballadores

A concesionaria do transporte urbano de Ourense non se reunirá este venres cos traballadores

G24.gal 05/05/2022 23:41 Última actualización 05/05/2022 23:58

Para este venres estaba convocada unha reunión entre a concesionaria de Urbanos de Ourense e os representantes dos traballadores. 

Nun comunicado remitido aos medios, a empresa Avanza dixo que non iría e denunciou "roturas de cristais, picadas de pneumáticos, rotura de manguitos e manipulación de matrículas", feitos que provocaron a "inutilización" de varios vehículos, algo que, segundo Avanza, “atenta directamente contra o dereito á mobilidade” da cidadanía.

"Non se dan as condicións” para reunirse mentres continúen os “graves ataques” contra os vehículos, dixo a concesionaria.

Avanza dille ademais ao comité de empresa que  “abandone a violencia” e se  comprometa a resolver este conflito.

Polo momento, as dúas partes están emprazadas “a partir da semana que vén” á mediación por parte da Xunta de Galicia, coa participación de mediadores profesionais a fin de buscar unha solución que poña fin á folga.

Pola súa banda, o comité de empresa cuestionou “as tácticas dilatorias” utilizadas polo Grupo Avanza despois de “máis de 30 meses de negociación”.

 CCOO denuncia “aprazamentos reiterados de reunións, desculpas varias, atrasos sistemáticos. A última ante o  AGA coa esixencia de retirada da folga para sentar a negociar e agora unha nova desconvocatoria unilateral da reunión prevista para o venres 6 de maio, que ao noso xuízo xa era tardía”.

A CIG reprochou a “nula vontade negociadora” da empresa tras cuestionar as súas continuas “escusas” para non sentar a negociar “contra a precarización laboral e por un convenio digno”.

Doutra banda, denunciou que algúns vehículos teñen máis “dúas décadas de antigüidade” e presentan “deficiencias desde hai anos” e que algún circulaba a pesar de ter a ITV caducada.
 

Publicidade
Publicidade
Publicidade
Publicidade