Os veciños do xardín do Posío protestan pola corta de árbores centenarias
Din que a eliminación destes exemplares sans non estaba prevista no proxecto de rehabilitación deste espazo emblemático que promove o
Concello
O goberno local di que se só se están a retirar oito exemplares de especies foráneas e en mal estado
Polémica en Ourense pola rehabilitación do histórico xardín do Posío. Os veciños din que se está levando a cabo a corta de árbores centenarias, en contra do que figuraba no proxecto inicial. As queixas veciñais, que se manteñen dende o inicio das obras, céntranse na corta de árbores no interior deste parque emblemático. Din que non se está a respectar o proxecto inicial e xa se eliminaron 25 exemplares, a maioría centenarios, segundo aseguran.
Denuncia a entidade Amigas das Árbores, que lidera as mobilizacións, que a cidade incumpre as normativas da OMS e da Unión Europea na proporción de árbores por habitante. Mentres os organismos internacionais cifran nunha árbore por cada tres habitantes, Ourense situaríase nunha por cada vinte e un veciños, aseguran os denunciantes.
Segundo o goberno local, o que se pretende levar a cabo no Posío é unha reforma integral do parque e o saneamento da masa vexetal, coa eliminación de exemplares en mal estado ou de especies foráneas. Responde ás queixas dos veciños con que se van plantar 50 árbores e cinco mil plantas ornamentais na rehabilitación deste espazo verde.
A entidade Amigas das Árbores lidera a mobilización veciñal, que denuncia as continuas agresións dos sucesivos gobernos municipais ao histórico xardín do Posío, con máis de douscentos anos de antigüidade.
