Protesta por terra e mar para "enterrar" a celulosa de Altri e a mina de Touro

Milleiros de persoas en terra, unhas 10.000 segundo a organización, e 300 barcos secundaron na illa de Arousa a manifestación para enterrar dous proxectos industriais: a macrofactoría de celulosa de Altri en Palas de Rei e a mina de Touro.

A Plataforma Ulloa Viva, a Plataforma en Defensa da Ría de Arousa (PDRA) e a Plataforma Veciñal Mina de Touro-O Pino Non convocaron esta mobilización para esixirlle á Xunta que "dunha vez por todas" rexeite ambos os dous proxectos.

Na praia do Vao, o presidente da Plataforma en Defensa da Ría de Arousa (PDRA), Xaquín Rubido, lamentou que Alfonso Rueda estea "decidido a sacrificar o río Ulla e a ría de Arousa para beneficiar a uns privilexiados".

Na súa opinión, estes proxectos "só benefician a unha minoría" e "prexudican á maioría", polo que acusou o presidente da Xunta de querer "malvender" Galicia e cambiar o "modo de vida" da súa poboación.

A portavoz de Ulloa Viva, Marta Gontá, considerou que con seis manifestacións contra o proxecto de Altri, 27.000 alegacións e un "informe demoledor" do Consello da Cultura Galega "xa está todo dito".

Lembrou que a macrofactoría "non cumpre tecnicamente nin conta con licenza social" e que a empresa promotora "é mentireira" e trae "a peste". Por iso, apelou á Xunta a "enterrar estes proxectos dunha vez por todas" xa que ten as competencias.

A voceira da plataforma veciñal contra a mina de Touro, Che Cancelo, asegurou que tras nove anos de loita o conflito "segue máis vivo ca nunca". Ao seu parecer, "só a forza de todo un pobo unido pode paralo".

Segundo dixo, o proxecto de Cobre San Rafael para a reapertura da explotación "é o mesmo" que a Xunta denegou hai uns anos, pero agora a administración galega négase a rexeitalo outra vez.

En alerta pola defensa da auga

No porto de Xufre, ao termo da manifestación, representantes das tres plataformas leron un manifesto para trasladar que se mobilizaron "para defender a auga", que é a súa "vida" e que a Xunta quere "regalar aos proxectos depredadores da mina e da celulosa".

"Temos que seguir mobilizándonos e alerta para defender Galicia", sentenciaron.

Nesa mesma liña, a portavoz nacional do BNG, Ana Pontón, que participou na manifestación, sinalou á prensa que non se pode "baixar a garda ata que haxa unha retirada total de todos os permisos e autorizacións" para o proxecto de Altri.

Tamén expresou o seu rexeitamento á "megaminería contaminante" de Touro, "controlada por fondos voitre".

"Logramos paralizala, pero o goberno de Rueda volveu activar a súa reapertura cando decidiu regalarlle a declaración de proxecto industrial estratéxico en xuño de 2024", afirmou.

Segundo Pontón, "unha vez máis, vemos a Rueda dicindo 'non' a Galicia" e a un goberno do PP "empeñado en converter" esta comunidade "nunha colonia con barra libre para o espolio" dos seus recursos naturais, para que "se forren as empresas amigas do PP e as multinacionais".

Altri, un proxecto arquivado

No caso de Altri, que contaba coa declaración de impacto ambiental aprobada, a Xunta anunciou o 20 de febreiro o inicio do arquivo do expediente da macrofactoría proxectada en Palas de Rei.

O Goberno autonómico consideraba que a empresa non podía xustificar a conexión eléctrica prevista, despois de que a planta quedara fóra da planificación enerxética estatal ata 2030.

Posteriormente, o presidente Rueda ratificou que a tramitación "decae", que non se prevé compensación algunha para a empresa e que, se no futuro lograse unha nova conexión, tería que iniciar un expediente completamente novo desde cero.

Mentres, o xacemento de cobre de Touro foi declarado estratéxico e tramítase un novo proxecto presentado por Cobre San Rafael tras rexeitar unha iniciativa anterior por informes medioambientais desfavorables.