Bota a paus e bastonadas os atracadores violentos e armados que entraron na súa xoiería
O asalto foi en xuño e agora a Garda Civil detivo os cinco integrantes da banda
O xoieiro xa se enfrontara do mesmo xeito a outro atracador en 2012
O atraco, gravado polas cámaras de seguridade do comercio, ocorreu o pasado mes de xuño. Catro encapuchados entran nunha xoiería do concello madrileño de Humanes. Un inmobiliza un cliente mentres o resto asalta os mostradores e golpea repetida e violentamente o propietario. Lonxe de arredarse, a vítima deféndese co primeiro que atopa. O pau dunha vasoira.
Algo de dano debeu facer porque un dos atracadores acode en auxilio do compañeiro e arrebátalle ao xoieiro o pau, xa roto, mentres o ameaza cunha pistola na cara.
Pero o propietario do local non se rende e faise no taller cunha nova arma defensiva máis contuntende. E así, a bastonadas, consegue que marchen a fume de carozo.
Seguindo as pistas de esta gravación a Garda Civil logrou finalmente agora identificar e localizar os delincuentes. Detiveron os catro atracadores e o cómplice que os agardaba fóra nun coche.
Nos rexistros recuperáronse pezas de xoiería, reloxos, armas e ferramentas para a comisión dos roubos. Os detidos, de entre os 24 e 42 anos, teñen antecedentes por feitos semellantes.
Desta volta non sabían a quen se enfrontaban. O mesmo xoieiro xa impedira outro asalto en 2012 tamén a bastonadas. Daquela mesmo logrou reter o ladrón ata que chegou a policía.