O Círculo de Empresarios premia a Marián Mouriño por transformar o legado do Celta
"Honrar un legado non significa simplemente conservar o que recibimos. Significa ter a valentía de transformalo, facelo medrar e adaptalo aos novos tempos", sinalou a galardoada
O Círculo de Empresarios de Galicia entregou este venres a súa Medalla de Ouro 2026 á presidenta do Real Club Celta, Marián Mouriño, por "transformar" o legado do equipo galego.
Este foi o acto central dunha gala conmemorativa do trixésimo cuarto aniversario do Círculo, que marcou un fito inédito ao ser a primeira vez que un pai e unha filla reciben esta máxima distinción (Carlos Mouriño recibiuna en 2013) e que as dúas institucións están presididas simultaneamente por mulleres.
A presidenta do Círculo, María Borrás, reivindicou que esta coincidencia non sexa "unha anécdota bonita para unha foto", senón algo "normal", de maneira que "dentro de vinte anos" alguén lea esta información "e non entenda por que foi noticia".
Marián Mouriño recolleu o galardón "con orgullo de filla", trece anos despois de ver como premiaban o seu pai, e defendeu unha visión dinámica da herdanza empresarial.
"Honrar un legado non significa simplemente conservar o que recibimos. Significa ter a valentía de transformalo, facelo medrar e adaptalo aos novos tempos", sinalou.
A presidenta do Celta puxo en valor a reconexión do club co seu contorno, o impulso ao proxecto Celta 360 e a colaboración público-privada como motor económico para a cidade e a comunidade autónoma.
Borrás, pola súa banda, reflexionou sobre o peso das sagas empresariais e o mérito propio fronte á sucesión familiar.
"Marián e eu sabemos ben o que pesa un apelido. As dúas tivemos que decidir se o apelido ía ser unha sombra ou unha raíz. As fillas non herdamos un cargo. Herdamos unha responsabilidade. O cargo gañámolo nós", afirmou.
Tamén sinalou que "esta medalla non é un premio a unha muller", senón a "unha forma de dirixir", con criterio, con canteira, con 'afouteza' e corazón.
"O teu pai (Carlos Mouriño) recibiu esta medalla por construír; ti recíbela por transformar", díxolle Borrás á actual presidenta do Celta.
O presidente do Parlamento de Galicia, Miguel Ángel Santalices, foi o encargado de imporlle a Medalla, mentres que o alcalde de Vigo, Abel Caballero, entregou a Escultura Corporativa do Círculo e a presidenta da institución, María Borrás, a Acta de Recoñecemento de Méritos.