A CIG mantén a folga no metal da Coruña ante a "tomadura de pelo" da patronal

O secretario comarcal de CIG-Industria en Ferrol, Sergio Martínez, cualificou de "totalmente ridícula" a nova oferta da patronal do metal na provincia da Coruña e anuncia que os paros convocados para este martes e mércores, 16 e 17 de xuño, se manteñen tras unha reunión que, na súa opinión, supuxo "cinco horas perdendo o tempo".

Martínez explicou que a reunión, celebrada este luns desde as 10.00 ata pasadas as 15.00 horas, na que participaron representantes de CIG, CCOO e UGT, apenas rexistrou un movemento por parte da representación empresarial: "Subir un 0,25% a partir de 2027 respecto da plataforma que nos presentaron o venres". Unha proposta que cualificou de "ridícula" e que evidencia que ambas as partes están "nas antípodas".

"Non hai ningún avance, nin en materia salarial, nin en vixencia, nin en fixos descontinuos, nin en nada. Nada de nada", sentencia.

O  sindicalista engade que os sindicatos fixeron "rebaixas nas súas pretensións" e que non foron tomadas en consideración.

"Isto é unha tomadura de pelo", denuncia. Tras o fracaso da negociación, os traballadores teñen previsto celebrar asembleas esta mesma tarde en todas as comarcas, a partir das 19:00 horas, para preparar as mobilizacións.

"Mañá martes seguimos coa convocatoria de folga", confirma Martínez, quen lamenta que a patronal non fixase "nin data para unha nova reunión". "Así quedamos, un desastre", conclúe.