Os concellos máis turísticos asumen os retos derivados da chegada masiva de veraneantes

A poboación dos concellos máis turísticos multiplícase durante o verán, cun importante impacto económico, pero tamén con novos retos para os servizos e para o día a día da veciñanza. Comprobámolo en Miño, un dos destinos máis concorridos da comarca das Mariñas Coruñesas.

"Viñemos cando a pandemia, gustounos moito a zona e dede aquela vimos todos os anos". "Tes a autoestrada preto, a praia, moitas zonas verdes... telo todo". "A contorna é moi bonita, a praia é marabillosa e a xente é moi hospitalaria", comentan varios turistas.

É o destino habitual de vacacións para moitas familias que teñen aquí unha segunda residencia e que  contribúen a multiplicar no verán unha poboación que o resto do ano apenas supera os sete mil habitantes. Agosto comezou cunha ocupación hostaleira próxima ao cen por cento.

"Nós estamos completos e temos chea toda a axenda ata a eclipse", dinos Mari Pantín, do hotel La Terraza.

Casas e hoteis completos que traen consigo algúns contratempos no día a día da vila.

"O maior problema e esperar as colas no supermercado e aparcar". "Teño que vir aquí ao súper, pero xa prefiro ir ao de Betanzos ou a Ferrol. O outro día tiven que dar polo menos seis voltas para aparcar alí arriba de todo, que para levar a compra... Pero hai que aceptar esas cousas ,a xete sale e é normal", din tres veciñas de Miño.

"Reforzamos o cadro de persoal porque aumenta moito o traballo. Igual pasamos de dez carros de mercadoría a trinta", detalla Raquel Rodríguez, empregada do Gadis.

Son  incovenientes que en Miño, en xeral, aceptan cun sorriso, sabedores da importancia do turismo na comarca e de que en setembro recuperarán a calma.