A campaña Vai de Peixe introduce o mar na dieta dos 'millennials'

Gústalles o peixe, pero cando se emancipan desas nais e pais, a maioría non se animan a cociñalo. 

"Cremos que vai ser moi caro e ademais é difícil escoller no mercado o que estea en mellor estado", di unha estudante.

Fáltalles un empurrón para tirarse ao mar e aos seus saudables manxares, e iso é o que busca a campaña Vai de Peixe.

"Busca convencer a xuventude de que é posible comer peixe, que non é caro e que se poden preparar receitas moi sinxelas", di Rosa Quintana, a conselleira do Mar.

Receitas, ideas e trucos que navegarán na web da campaña, no TikTok e nos perfís de María Mera, Donkey Cool, Xurxo Carreño ou Engaliciamórate. Influencers que se encargarán de vender o peixe nas redes.

"Creamos referentes. Se nas redes ves moitas receitas acabas anotando para facelas, e se ves moitas de peixe ao final te acabas animando a cociñalo máis", explica Fanny, a instagrammer de Engaliciamórate. 

"Nos meus vídeos sempre meto cousas do mar: mexillóns, nécoras, lagostinos... Á xente gústalles porque intento facelo con humor e anímanse a facelas na casa", engade Xurxo.

A idea é que a mocidade se enganche tamén a estoutras redes, as do peixe, e que aposten por unha alimentación saudable e comprometida co medio ambiente.