A avicultura artesanal permite dispor de ovos da casa con todas as garantías

Quen teña un galiñeiro na casa para consumo propio ata un máximo de 30 galiñas, tan só está obrigado a rexistrar os animais. Logo están explotacións como a de Carlos, avicultor artesanal de Arteixo.

"Unha das diferenzas é que as de autoconsumo non poden vender os ovos. Nós como temos un control sanitario de salmonela e todo iso, nós si que podemos levar os ovos a feiras, podemos vender aquí na casa sen ningún problema e incluso montando unha sala de envasado podemos venderlle a comercios, restaurantes, supermercados e a todo tipo de persoas", explica Carlos López, responsable de avicultura artesanal A Senra.

Ten unhas 35 galiñas poñedoras e 20 galos para carne. Todos da raza autóctona Galiña de Mos.

"Nós non sometemos como na industria as galiñas a ciclos moi grandes de luz. Aquí están en liberdade completamente e chegados estes meses temos o problema de que a posta baixa porque elas detectan menos horas de sol e entón baixa a produción destes ovos".  

Con asesoramento da asociación Avimós, a explotación de Carlos responde a un modelo produtivo con sistemas máis respetuosos co benestar animal.

"Este ovo é totalmente distinto ao que coñecen e a persoa que proba un ovo destes esquece o ovo da compra. Non vai máis ao super a por ovos", asegura Carlos. 

Na avicultura artesanal os prezos oscilan entre os 5 e os 7 euros a ducia de ovos.