Douscentos oitenta mil novos casos de cancro este ano: pulmón e mama, entre os máis diagnosticados
Este venres celébrase o Día Mundial Contra o Cancro, unha patoloxía da que este ano se terían que diagnosticar en España máis de 280.000 casos, aínda que quizais sexan menos pola incidencia da pandemia, que está a dificultar os cribados e por tanto a localización da enfermidade.
Segundo o informe da Sociedade Española de Oncoloxía Médica, nas últimas décadas creceu o número absoluto de cancros diagnosticados en España como consecuencia do envellecemento da poboación, a exposición a factores de risco e o aumento da detección precoz, que nos últimos anos se retardou.
O risco para contraer cancro empeza a aumentar de forma importante a partir dos 45 ou os 50 anos. Desde o nacemento ata os 80, os homes teñen un risco de desenvolver cancro nun 40,9 % e as mulleres nun 27 %.
Aos 85 anos, estes valores son dun 49,1 % nos homes e dun 31,8 % nas mulleres. Os cancros máis frecuentemente diagnosticados en España en 2022 serán os de colon e recto (43.370 novos casos), mama (34.750), pulmón (30.948), próstata (30.884) e vexiga urinaria (22.295).
Nos homes, o cancro máis diagnosticado será o de próstata, colon e recto e pulmón, e nas mulleres serán os de mama, colon e recto, a moita distancia dos de pulmón. En España, estímase que a mortalidade por cancro subirá dos 113.000 casos que houbo en 2020 a máis de 160.000 en 2040.
A mortalidade por cancro en España experimentou un forte descenso nas últimas décadas, o cal supón unha mellora da supervivencia dos pacientes. A mortalidade por cancro de páncreas incrementou, tanto en homes como en mulleres, debido ao aumento da súa incidencia, e, pola contra, en cancro de estómago descendeu de forma moi significativa en España nas últimas décadas.
No caso do cancro de pulmón, a mortalidade baixa en homes e sobe en mulleres. Segundo datos publicados pola Organización Mundial da Saúde no seu Informe Mundial do Cancro 2014, ao redor dun terzo das mortes por cancro son debidas aos cinco factores evitables: o tabaco, as infeccións, o alcol, o sedentarismo e as dietas inadecuadas.
