Desaloxado un edificio de 10 plantas en Pontevedra por un incendio nun garaxe

O incendio nun garaxe obrigou a desaloxar esta mañá un edificio de 10 pisos en Pontevedra. O lume comezou nun vehículo que estaba estacionado no aparcadoiro, na rúa Cruz Gallastegui.

Foron os veciños do inmoble os que alertaron os servizos de emerxencias despois de detectar unha intensa fumareda. Afortunadamente non se rexistraron danos persoais.

Todo apunta a que a causa do incendio foi un fallo eléctrico no vehículo, que quedou completamente calcinado. O tráfico na zona tivo que ser cortado debido aos traballos de extinción.