Catro feridos nun incendio que calcinou unha nave de maquinaria agrícola en Ponteareas
Os operarios resultaron intoxicados por inhalación de fume
O Concello pide á cidadanía que non se achegue á zona afectada debido aos gases derivados da combustión
As lapas queimaron vehículos e motoserras, tamén arderon bidóns de aceite e gasolina que intensificaron o lume
TVG
Catro persoas tiveron que ser trasladadas ao Hospital Álvaro Cunqueiro de Vigo tras un incendio na nave da empresa Alper, situada no quilómetro 643 da N-120 e dedicada á venda de material agrícola no municipio pontevedrés de Ponteareas.
Os operarios resultaron intoxicados por inhalación de fume, segundo responsables da empresa.
As lapas queimaron vehículos e motoserras e tamén arderon bidóns de aceite e gasolina que intensificaron o lume, segundo informaron os Bombeiros de Ponteareas.
Malia que o incendio está controlado, os bombeiros continúan realizando tarefas de arrefriamento da instalación, segundo informou o Concello de Pontareas.
O lume orixinouse nun almacén
Foi no almacén onde se orixinou o lume por causas que de momento se descoñecen.
Por motivos de seguridade, o Concello pide á cidadanía que non se achegue á zona afectada debido aos gases derivados da combustión.
Así mesmo, solicita manter libres os accesos para facilitar a chegada e a intervención dos servizos de emerxencias que se están desprazando ao municipio para colaborar nos labores de extinción.
O 112 Galicia informou que o incendio comezou contra as 14:50 horas deste martes e foi un particular o que alertou da presenza de fume. Así mesmo, os Bombeiros de Ponteareas tamén indicaron que se desprazaban ao lugar despois de recibir o aviso dun particular.
A central de emerxencias informou os Bombeiros do Baixo Miño, á Garda Civil, á Policía Local e aos efectivos de Protección Civil.
Unha vez no lugar, os equipos de intervención solicitaron asistencia sanitaria para varios traballadores, polo que avisaron ao Servizo de Urxencias Sanitarias de Galicia-061.
