Trasladan ao CHUAC un paciente do hospital militar por un lume no seu cuarto
A policía científica abriu unha investigación para esclarecer as causas do incendio
As lapas afectaron o colchón onde estaba o único paciente que ocupaba nese momento o cuarto
Imaxe de arquivo do Hospital Abente e Lago da Coruña
Un paciente do hospital Abente e Lago da Coruña, máis coñecido como hospital militar, tivo que ser trasladado á unidade de queimados do complexo hospitalario universitario da Coruña (CHUAC) ao sufrir queimaduras tras rexistrarse un conato de incendio no seu cuarto.
O suceso, segundo a información do 112 Galicia, produciuse sobre as 01:10 horas deste sábado e foi un particular o que indicou que había lume nun cuarto da terceira planta. No cuarto só estaba ingresado un paciente.
Pola súa banda, o persoal do hospital activou o protocolo ante este tipo de situacións e avisaron os bombeiros e a policía, segundo indicaron fontes da área sanitaria.
Ata o punto desprazáronse os Bombeiros da Coruña que detallaron que o lume ocasionou danos nun dos colchóns dunha das camas, o que lle causou queimaduras a un paciente que foi trasladado en ambulancia ao CHUAC, onde permanece ingresado con prognóstico reservado.
O lume foi extinguido polo persoal de seguridade en colaboración co persoal da planta e os Bombeiros procederon a realizar labores de ventilación.
Pola súa banda, os traballadores da planta foron trasladados ao servizo de urxencias do CHUAC onde lles realizaron unha valoración e recibiron a alta.
Agora, o cuarto está precintado para que a policía científica realice os labores correspondentes.
