Xermade acolle o maior encontro peninsular de torneiros da madeira
A vila chairega celebra a XXVI edición desta cita de carácter internacional, con demostracións de mestres chegados de diversos países
No Encontro Internacional de Torneiros da Madeira de Xermade todo xira arredor do traballo co torno. Con preto dun cento de amantes do torneado chegados de varios continentes, mestres de diversos países amosan as técnicas e os pequenos segredos cos que lle dan forma a esta material.
"Hai que facer por conservar os coñecementos e a cultura do torneado. O que vén agora é todo tecnoloxía e, salvo excepcións, vai ser difícil que isto continúe. Pero nós imos tratar de conservalo", indica o mestre torneiro Lolo Castro.
"No caso da Arxentina, o meu país, tampouco hai moitos torneiros. Falta ese movemento e interese que todos os torneiros teñen, porque moitas veces non comparten ese espazo de intercambio", sinala Ricardo Zapata, aprendiz de torneiro.
"De lonxe, é o maior encontro que se fai na Península Ibérica, co maior número de participantes e con demostracións dalgúns dos mellores torneiros do mundo", desta o torneiro Paulo de Tarso.
Ademais de poder observar ao vivo o traballo dos mestres, no encontro expóñense un milleiro de pezas realizadas ao longo do último ano polos torneiros participantes.
"Adoitan traer as pezas que para eles son representativas. As que amosan a súa forma de traballar e que teñen algo especial son aquí representadas", afirma Alfonso Franco, presidente da asociación Amigos da Madeira.
Como novidade, unha selección de pezas dos diferentes encontros poderá contemplarse de xeito permanente no Centro Internacional de Tornería de Xermade, inaugurado este mesmo verán. Tocante á presente edición, estará aberta ao público ata este domingo.
