Galicia non ten incendios activos por primeira vez desde o 5 de agosto
Este xoves quedaron estabilizados os dos últimos que quedaban activos na Pobra do Brollón e Avión
A vaga de incendio deixa máis de 96.000 hectáreas arrasadas, segundo cifras de Medio Rural
O impacto do lume na Mezquita (EFE/Brais Lorenzo)
Galicia está este xoves sen ningún lume activo de máis de 20 hectáreas por primeira vez desde que empezou a vaga de incendios este mes de agosto, despois de que quedasen este xoves estabilizados os que había na Pobra do Brollón e Avión.
O último balance de Medio Rural recolle que o lume da Pobra do Brollón quedou estabilizado ás 11:07 horas deste xoves, tras queimar 900 hectáreas, mentres que ás 14:42 horas estabilizouse o de Avión (250 ha).
É a primeira vez que un parte de Medio Rural -que só inclúe os focos de máis de 20 hectáreas ou que afectan a espazos protexidos- non inclúe lumes activos desde o que divulgou á primeira hora do martes 5 de agosto.
A grande vaga de incendios que a comunidade sufriu este mes de agosto arrasou 96.000 hectáreas, segundo as cifras da Xunta, a maior parte na provincia de Ourense, polo que 2025 é xa o ano con máis extensión queimada en Galicia este século.
Non hai ningunha estrada cortada ao tráfico, aínda que segundo a información de Adif permanece interrompida a circulación entre Monforte de Lemos e San Clodio-Quiroga, da liña Monforte-Ponferrada, que tivo que pecharse polo incendio da Pobra do Brollón.
En canto ao resto de focos, está estabilizado desde onte o de Carballeda de Valdeorras-Casaio, tras calcinar 5.000 hectáreas desde que entrou na comunidade galega procedente de Zamora.
A mellora das condicións meteorolóxicas, cun descenso das temperaturas e choivas nalgunhas zonas, permitiu onte á noite dar por controlados varios dos grandes incendios estabilizados nos últimos días e que arrasaron máis hectáreas durante a vaga.
Están nesta situación o de Larouco, o máis grande da historia de Galicia con 30.000 hectáreas queimadas e dúas dos tres focos do de Chandrexa de Queixa (19.000 ha), mentres permanece estabilizado o foco de Vilariño.
Tamén están controlados os de Oímbra e Xinzo de Limia (17.000 ha), A Mezquita-A Esculqueira (10.000 ha), Carballeda de Avia e Beade (4.000 ha), Maceda (3.500 ha), Montederramo-Paredes (120 ha) e Vilardevós-Vilar de Cervos (900 ha).
