As familias ultiman os preparativos para a volta ao cole

As librerías e papelerías de todo o país teñen estes días un pico de actividade coa venda do material necesario para o comezo do curso escolar, previsto para o vindeiro 8 de setembro. Bolígrafos e ceras, cadernos, carpetas e folios e mais mochilas e estoxos son algúns dos produtos máis demandados, cun custo que pode acadar os 200 euros en función do colexio.

"Algúns coles solicitan marcas concretas dalgún artigo, o que pode encarecer o total. A media andará polos corenta e pico euros, pero pode haber xente que incorpore unha mochila ou un estoxo concreto, e ao final a conta sobe", sinala Eva Cancela, propietaria da librería Campus.  

Ao gasto no material escolar hai que engadirlle o dos libros de texto, que supón un desembolso aínda maior. Dependendo do centro, o seu importe pode dispararse ata superar mesmo os 400 euros. Neste sentido, os libreiros sinalan que aumentaron as vendas grazas aos colexios que decidiron reintroducir os manuais en formato físico.

"Estase notando, porque este ano xa incorporaron dous ou tres libros algúns cursos de colexios que o ano pasado non os pedían", engade a libreira. 

Algúns comercios ofrecen descontos para os clientes, que se poden compatibilizar cos das administracións públicas. É o caso dos cheques da Xunta, de ata 240 euros en primaria e 270 na ESO, e de ata 105 euros desgravables para as familias cuns ingresos per cápita dun máximo de 30.000 euros.