WhatsApp baixa dos 16 aos 13 anos a idade de uso en Europa

A partir dos 13 anos un neno ou nena pode crear unha conta de WhatsApp sen saltar a política de empresa despois de que META, o xigante das redes sociais, rebaixara a idade de uso, que antes estaba nos 16 anos.

Para as nais e pais, xa preocupados polo uso que os rapaces fan dos móbiles, din que as grandes empresas tecnolóxicas só pensan en aumentar os seus beneficios e que unha vez máis tócalles a eles vixiaren o uso.

E lembran, que WhatsApp non ten ningún sistema de verificación de idade, o que fai que mesmo menores de 13 anos poidan empregalo tamén. O medo é, din, que formen parte dalgún grupo con contido inapropiado e mesmo ilegal ou que sofran acoso ou enganos neste chat.

META acaba de recibir críticas de defensores dos dereitos dos nenos de toda Europa tras este cambio de normativa.