Volven as feiras do viño con formato prepandemia
Volven as feiras do viño con formato prepandemia
Xa se celebraron as máis tradicionais na Ribeira Sacra e no Ribeiro
Os adegueiros volveron reencontrarse cos consumidores na Feira do Viño de Chantada. Esta edición, a número 39, foi a primeira sen restricións desde que comezou a pandemia. Con todo, a covid aínda condicionou as datas. Houbo que adiala de marzo a xuño.
E a de Chantada non é a primeira festa de viños da Ribeira Sacra postpandemia. Outras con décadas de tradición como as de Quiroga, Sober e Pantón tamén recuperaron as súas. Había ansia de catar o que deron as últimas colleitas, unhas colleitas que nesta denominación de orixe supoñen un grande esforzo. Son o resultado da chamada viticultura heroica pola orografía do terreo en que se cultivan as viñas.
As festas do viño atraen turismo e vida a estas localidades. Son moitos os naturais da zona que viven fora e regresan para a feira. Un xeito de homenaxear tamén a xente que fai posible a vida e a industria do viño.
Tamén recuperou a súa feira a denominación de orixe máis antiga de Galicia. A do viño do Ribeiro puido por fin celebrar a súa edición 59.
As Feiras do Viño son só e nada menos que un vínculo coa tradición dos que aman e viven deste mundo. Un lugar de encontro que o longo dos próximos meses se repetirá en moitas localidades doutras comarcas vitivinícolas de Galicia.