Veciños de Conxo, en Santiago, denuncian os conflitos que xeran os ocupas dun narcopiso
O ocupa tiña o piso alugado, pero rescindíronlle o contrato e non marchou
Os veciños denuncian que trafica con estupefacientes e que a trasfega de xente xera un ambiente inseguro e conflitivo
Hai uns días, durante unha liorta entre o ocupa e outras persoas, esnaquizaron o portal do edificio por segunda vez
Hai uns días, durante unha liorta entre o ocupa que reside no primeiro andar do edificio número 49 da rúa compostelá de Sánchez Freire e outros descoñecidos, romperon o portal do inmoble.
O home, que está tutelado pola FUNGA, tiña un contrato de alugueiro, pero tras as queixas dos veciños polo seu comportamento incívico, o propietario rescindiulle o contrato. Pero, lonxe de marchar, o inquilino segue ocupando a vivenda, que se converteu, segundo os veciños, nun narcopiso.
Aseguran que o ir e vir de xente que acode mercar droga é constante día e noite. Mesmo describen como alguns consomen a droga nas escaleiras ou nos corredores da comunidade.
Ademais do tráfico de estupefacientes, o que máis angustia os veciños son as pelexas e situacións violentas que se producen. Describen patadas nas portas, berros, lanzamento de mobles pola fiestra á rúa. Pero o que máis lles preocupa é a seguridade dos seus fillos, que viven con medo de saír á rúa. Foi o caso da filla de Sarah, unha muller norteamericana que reside no inmoble e que faltou á clase porque tiña medo o día que romperon o portal.
A Policía Nacional confirmou que este caso está baixo investigación, pero a paciencia dos veciños está ao límite. Tres xa se mudaron, ao non soportar este ambiente de violencia e inseguridade, pero o resto ou non poden ou non queren trasladar as súas vidas, polo que esixen solucións antes de que ocorra algo grave.
