Desaloxados en Lugo os 'okupas' dunha caseta vella de obra nun soar

Unha vella caseta de obra situada nun soar da rúa Mondoñedo, en Lugo, era o lugar onde estaba a vivir unha parella de mediana idade. O dono da parcela topouse cos ocupantes da infravivenda cando acudiu para rozar a maleza, polo que decidiu chamar a policía co fin de evitar calquera tipo de altercado. Finalmente, abandonaron o terreo de xeito pacífico, poñendo fin a unha situación que viñan denunciando os veciños da zona. 

"Levamos xa moito tempo queixándonos de que unha parella estaba a vivir nesta caseta. Tiveron que retiralos de aí por salubridade, porque ninguén pode vivir nunha caseta de obra nestas condicións, e tamén porque os servizos sociais tivesen un sitio onde aloxalos", sinala Fernando Toubes, voceiro da plataforma veciñal SOS Milagrosa-Lugo Norte. 

A mesma caseta de obra xa fora ocupada anteriormente por indixentes, e en ocasións mesmo chegou a utilizarse para a venda de droga. Neste sentido, nos negocios da contorna denuncian que se rexistrou un incremento da delincuencia, polo que algúns comerciantes tiveron que tomar medidas drásticas.

"Nesta zona houbo varios roubos. O ambiente encrespouse moito por aquí, tanto nas Casas Sindicais como en Lamas de Prado ou na rúa Mondoñedo", lamenta Toubes. 

Pola súa parte, o dono do terreo prevé retirar a caseta nos días vindeiros.