Veciños anuncian accións xudiciais por "o caos" do Nadal de Vigo

A Asociación de Veciños Zona Centro de Vigo anunciou este martes o inicio de accións xudiciais contra "os responsables da situación que, desde 2019, converte cada Nadal nun período de caos circulatorio, problemas de mobilidade, de seguridade, sucidade e de contaminación acústica e lumínica no corazón da cidade".

Os veciños conseguiron reunir máis de 13.600 euros grazas a doazóns dos 25.000 que calculan que necesitan para probas periciais e estudos técnicos, honorarios de avogados e costas xudiciais e outros gastos legais e administrativos.

"Non podemos seguir soportando esta situación. Imos actuar para que non se repita e para protexer a nosa cidade, a nosa saúde e o noso patrimonio", afirman uns veciños que durante máis de dous meses, contando montaxe e desmonte de atraccións, "sofren graves dificultades para acceder ás súas vivendas e traballos, perdas económicas nos seus negocios e unha degradación constante da calidade de vida".

Os veciños móstranse, ademais, especialmente sensibles coa Alameda de Vigo, o xardín máis antigo e emblemático da cidade, protexido por lei e para o que a asociación solicitou a súa declaración como Ben de Interese Cultural (BIC) xa que, segundo sinalan, está a sufrir un deterioración ano a ano pola instalación masiva de actividades mercantís por parte dunha empresa con sede en Madrid.

"O Tribunal Superior de Xustiza de Galicia xa condenou ao Concello por vulnerar os nosos dereitos fundamentais, pero as sentenzas ignóranse e séguense autorizando actividades ilegais nunha Zona Acusticamente Saturada (ZAS). Informes periciais acreditan niveis de ruído de 81 decibeis en fachada e 46 dentro dos dormitorios, moi por encima do permitido", afirman nun comunicado.

Todo o anterior levoulles a pedir axuda para financiar o proceso legal contra os que denominan responsables do Nadal de Vigo.