Varios feridos tras incendiarse unha vivenda en Monte Alto, na Coruña

Dúas persoas foron trasladadas ao hospital tras un incendio nunha vivenda no barrio de Monte Alto, na Coruña. Segundo o parte dos bombeiros, o lume iniciouse sobre as 03:30 horas deste martes no baixo dun edificio de dúas plantas na Avenida de Hércules, na intersección con Ramón del Cueto.

Foron varios particulares os que deron a voz de alarma e avisaron ao 112 que no interior da vivenda había varias persoas que pedían axuda e observábase unha gran fumareda. Cando chegaron os bombeiros, o resto de veciños xa desaloxaran as súas vivendas, así que os bombeiros puideron traballar no interior para sufocar as lapas.

Varias persoas feridas foron atendidas polas ambulancias do 061 e dúas delas tiveron que ser trasladadas ao hospital da Coruña. Os danos na vivenda foron importantes, segundo informan os bombeiros.

A central de emerxencias mobilizou aos profesionais de Urxencias Sanitarias de Galicia-061, aos Bombeiros, Policía Nacional e Local da Coruña.Sobre as 04.20 horas, os bombeiros confirmaron que o lume estaba apagado e que arderon materiais acumulados na planta baixa da vivenda.