Denuncian o mal estado do firme da N120 entre Monforte e Ourense

Usuarios da estrada nacional 120 denuncian o mal estado do firme entre Monforte e Ourense, especialmente na baixada desde o alto de Guítara ata Os Peares. É un treito duns 11 quilómetros, pero especialmente perigoso pola pronunciada pendente e porque ten moitas curvas. 

No carril de baixada, uns sinais provisionais advirten do mal estado da vía. É o treito máis deteriorado da nacional 120 entre Monforte e Ourense.

"Nótalo na vibración do coche. Ademais é unha estrada perigosa, polas curvas. Sobre todo nun día coma hoxe, se chove e hai néboa". "É un perigo para a circulación, porque queres esquivar a fochanca e ao mellor vén outro coche e podes ter unha colisión", comenta un condutor.

Atribúen a deterioración fundamentalmente ao abundante tráfico de camións, que se incrementou aínda máis no último ano debido ás obras de modernización da vía do tren entre Ourense e Lugo.

"Pedra, balastro... circula por estrada, así que hai máis tráfico do normal". "Por aquí baixan moitísimos camións de madeira, grandísimos, e cada día pasan a quince e a vinte", di un dos usuarios da estada.

Hai un ano, o Ministerio de Transportes anunciou unha partida de 15 millóns de euros para esta estrada, pero non inclúen este treito en concreto que, daquela, non estaba tan deteriorado.