Unha familia de venezolanos residentes en Marín, entre os desaparecidos tras os terremotos
Foi o colexio onde os nenos están escolarizados o que deu a voz de alarma
Trátase dunha familia de catro membros que cada ano adoitaba viaxar a Venezuela ao finalizar o curso
O cónsul venezolano en Vigo fai un chamamento á calma; a Xunta non ten constancia de vítimas galegas
(Reuters/Leonardo Fernández Viloria)
A alcaldesa de Marín, María Ramallo, informou de que unha familia, de catro persoas, que se atopaba de viaxe en Venezuela está desaparecida tras os terremotos.
Nun audio remitido aos medios, a alcaldesa detallou que foi o colexio onde os nenos están escolarizados o que, na xornada do xoves, deu a voz de alarma.
"Puxéronse en contacto comigo, en concreto o colexio, onde os seus fillos acaban de terminar o curso o venres, e parece ser que o sábado marchaba, coma todos os anos, a Venezuela coas súas familias", detallou.
A alcaldesa remarcou que se manterá en comunicación cos organismos oficiais para obter información e expresou a súa solidariedade "con todo o mundo" que está a sufrir esta situación. "Por suposto, ofrecer a axuda na medida das posibilidades que nós temos", remarcou.
O Concello de Marín convocou un minuto de silencio para o luns ás 12:00 horas como mostra de apoio ao pobo venezolano.
