Unha condutora circula en dirección contraria pola AP-9 en Narón
Incorporouse erroneamente no quilómetro 34, na zona de Freixeiro, pero detivo o vehículo na beiravía
Unha condutora incorporouse en sentido contrario á autoestrada AP-9F sobre as 08:30 horas deste martes, provocando un incidente de tráfico á altura de Narón, segundo confirmou a Garda Civil.
O suceso tivo lugar cando a muller accedeu desde a entrada 34 da autoestrada, no nó de Freixeiro. A condutora decatouse rapidamente do seu erro tras tomar a incorporación en sentido inverso ao correcto. Ao darse conta do perigo, a muller de inmediato estacionou o vehículo na beiravía.
A rápida actuación evitou un accidente e permitiu que as patrullas da Garda Civil de Tráfico se desprazasen ao momento para asegurar a zona e regular o tráfico. Tras a intervención dos axentes, conseguiuse que a condutora puidese renovar a marcha no sentido correcto da vía.
