Rosa Crujeiras, co 65,9% dos votos, fai historia e será a nova reitora da Universidade de Santiago
Impúxose á catedrática de Óptica Maite Flores, que logrou o 31,92 % dos apoios
Será a primeira vez en 500 anos da institución académica que unha muller sexa reitora
"É unha conquista social, unha conquista tamén da Universidade e unha débeda con todas as mulleres", asegurou Crujeiras tras coñecer o resultado das eleccións
Rosa Crujeiras. EFE/Lavandeira jr
A catedrática de Estatística e Investigación Operativa Rosa Crujeiras resultou gañadora na segunda volta das eleccións da Universidade de Santiago de Compostela (USC), celebradas este mércores.
A candidata obtivo un 65,9 % do voto ponderado e será a nova reitora da universidade. Crujeiras impúxose á catedrática de Óptica Maite Flores, que logrou o 31,92 % dos votos.
Foron unhas eleccións históricas para a Universidade de Santiago, xa que é a primeira vez nos seus máis de 500 anos en que unha muller será nomeada reitora e dirixirá a institución.
A nova reitora espera non ser a última muller que ocupa ese cargo
Rosa Crujeiras manifestou que espera non ser a última e "que despois de min veñan moitas reitoras máis a USC".
"É unha conquista social, unha conquista tamén da Universidade e unha débeda con todas as mulleres que formamos parte desta comunidade, ás que tanto nos custa chegar aos postos de responsabilidade", aseverou Crujeiras.
En declaracións aos medios tras coñecer os resultados, a nova reitora electa estendeu o seu recoñecemento "ao estudantado, ao persoal docente e investigador e ao persoal técnico de xestión, administración e servizos".
Rosa Crujeiras tamén tivo palabras de agradecemento para o seu equipo, así como para as profesoras López-Couso, Nogueira e Flores, candidatas das eleccións.
"Quero agradecerlles a todas elas que desen o paso, porque hoxe facemos historia na universidade e elas son parte tamén desta historia", reivindicou Crujeiras, que se converteu este mércores na primeira reitora nos 531 anos de historia da USC.
A reitora electa destacou que "comeza unha nova etapa, unha etapa de diálogo, de unidade, de consensos", unha etapa na que espera sumar "a todas aquelas persoas que votaron por outras candidaturas e que forman parte da comunidade".
Maite Flores: "Só había dúas opcións, gañar ou perder"
A catedrática de Óptica Maite Flores despídese da carreira ao reitorado da Universidade de Santiago de Compostela.
"A min gústame ser directa e analizar os resultados, aquí só había dúas candidatas e dúas opcións, gañar ou perder", aseverou Flores.
En declaracións aos medios tras coñecer os resultados, a catedrática cualificou a xornada electoral deste mércores de "histórica", xa que a comunidade universitaria elixiu á primeira muller reitora nos máis de 500 anos de historia da USC.
"Neste caso, a comunidade universitaria quixo que a gañadora fose Rosa Crujeiras, polo que non hai que xogar á adiviñas para saber quen perdeu. Tiñamos confianza na remontada porque percibiamos que os apoios da nosa candidatura ían a máis, pero non chegamos a ter o respaldo suficiente para gañar, esa é a única realidade que vale", recoñeceu.
O profesorado permanente, o que máis votou
O sector do profesorado permanente foi o que máis se mobilizou, concretamente cun 87,37 % de participación.
En segundo lugar, o persoal de administración e servizos, que rexistrou un 77,75 % de participación. A mobilización do resto de persoal docente e investigador (PDI) situouse no 59,37 % e, finalmente, a participación entre o alumnado foi do 26,99 %.
O artigo 48 do Regulamento Electoral Xeral da USC reflicte que neste sistema de votación ponderada, o sector I (profesorado doutor con vinculación permanente) supón o 51 % dos votos; o sector II (restantes categorías de persoal docente e investigador), o 11 %; o sector III (alumnado matriculado en titulacións oficiais), o 28 %, e, finalmente, o sector IV (persoal de administración e servizos), o 10 %.
