Un xuíz de Andorra pide que sete futbolistas españois declaren pola compra de reloxos de luxo
Os involucrados son Dani Carvajal, César Azpilicueta, David Silva, Santiago Cazorla, Juan Bernat, Giovanni Lo Celso e Thomas Partey
Supostamente mercaron 16 reloxos valorados en máis dun millón de euros, eludindo o pago do IVE
O vendedor é un empresario andorrán que está en prisión desde outubro acusado de contrabando e branqueo de capitais
A Garda Civil estalles enviando requirimentos a sete futbolistas españois para que acudan declarar a un xulgado de Andorra. O maxistrado andorrano sospeita que os reloxos que mercaron nunha empresa do Principado foi en realidade un mecanismo artellado para eludir o pago de impostos. Os involucrados son todos futbolistas ou exfubolistas da Primeira División, como Dani Carvajal, César Azpilicueta, David Silva, Santiago Cazorla, Juan Bernat, Giovanni Lo Celso e Thomas Partey.
Segundo a información publicada por elDiario.es, o xuíz atribúelles a compra de 16 reloxos das marcas Rolex e Patek Philippe, valorados nun millón trescentos mil euros. Eses reloxos foron importados de España por un empresario de Andorra que está detido desde outubro do ano pasado por contrabando e branqueo de capitais.
Amais dos futbolistas, investigan tamén outros sete particulares e empresas españolas que lle venderon os reloxos á compañía andorrá que llelos revendeu aos futbolistas, para eludir así o pago do IVE.
Dos sete futbolistas, o que máis gastou na empresa andorrana, segundo a resolución xudicial, foi Thomas Partey, o centrocampista do Villarreal, que entre 2020 e 2022, aboou 415.000 euros por tres reloxos da marca Patek Philippe.
