Un Tyrannosaurus rex e un Triceratops, ceibes polos corredores do Marineda City
Centos de persoas amoreáronse na praza interior do centro comercial para admirar os dinosaurios
Extinguíronse hai máis de sesenta millóns de anos, pero continúan causando fascinanción... e non só entre a cativada. Xente de todas as idades amoreouse ao redor da praza interior do Marineda City. Dous dinosaurios andaban soltos polos corredores do centro comercial.
O Triceratops chegou coma unha estrela de rock, escoltado por tres vixilantes de seguridade que tiveron que abrirlle paso ata a gran praza do centro comercial. Expectación máxima e ovación pechada para un dos dinosaurios máis icónicos do cretácico.
"O que máis me chama a atención é a súa coroa", comenta unha nena. Outra engade que "come herba". Un neno cunha figura dun Tyrannosaurus rex na man explica que "os cornos son para defenderse".
O seu nome vén do grego e significa cara con tres cornos. Contóunolo un dos centos de cativos que quixeron aproveitar a oportunidade de ver o Triceratops de preto.
No público, expertos na materia de todas as idades. Un cativo confesa que está obsesionado con Jurassic World, outro enumera todos os nomes dos dinosaurios que coñece.
O cine ten moito que ver con esta fascinación infantil, pero moito antes de que Spielberg os resucitase para a gran pantalla estas criaturas xa cautivaran a cativada de varias xeracións.
Extinguíronse hai sesenta e seis millóns de anos, pero estes xigantes mesozoicos seguen moi vivos no noso imaxinario, animándonos a explorar un mundo cheo de criaturas sorprendentes.
