Un selo musical vigués grava discos sobre cerámica

Os discos de vinilo rexorden. Grávanse para quen quere escoitar música percibindo todos os matices e para quen prefire conservar un soporte físico e non só unha lista virtual. En Vigo, con esta filosofía xorde Analogik Dreams, un selo musical que está a gravar discos sobre cerámica. 

Entramos no laboratorio de experimentación artístico e sonoro Río Lagares. A música Carme López participa na residencia artística e de gravación ao vivo do seu disco, sobre vinilo e sobre cerámica. 

"O que estamos facendo é unha discográfica ata onde sabemos única no mundo que vai editar discos feitos de cerámica. Traballamos con arxilas do país e facemos discos planiños que simulan o que sería un disco de vinilo empregando gravadores que se chaman cortadoras. Son tornos como tocadiscos cunha agulla gravadora. Poñemos os pratos de cerámica e gravamos en directo os artistas que van pasando por esta residencia", explica Alexandre Cancelo, coordinador de Analogik Dreams.

"Eu vendo xa algúns dos discos que hai xa estou pensando onde vou poñer o meu na miña casa porque vai quedar bonitísimo. Seguro que se vai escoitar moi ben, pero o resultado físico é precioso", asegura a música Carme López.

"É curioso porque a primeira vez que reproducimos unhas probas era como arqueoloxía. É a mesma experiencia, a de descubrir algo do pasado, cheo de ruído da arxila. É como un son un pouco escondido" di o investigador de tecnoloxía antiga de gravación Aleksander Kolkowski.

Soan os sucos tallados nuns discos que se asemellan aos pratos de Buño. Son lentos na feitura, labrados como a madeira, poden estalar no forno e non se sabe o resultado do proceso ata o final. Por iso son pezas únicas e non teñen espazo nas listas de reprodución.