Un raio impacta de cheo nunha casa da Illa de Arousa

A Luis, un veciño da Illa de Arousa, salvouno a porta de entrada da súa casa. Un raio impactaba de cheo na vivenda onde reside cos seus pais. Entrou pola cheminea e a partir de aí moveuse por todo o interior da casa, deixando estragado todo o sistema eléctrico.

Completamente estragada quedou esta vivenda da Illa de Arousa despois de que un raio impactara contra a casa. Todo pasou moi á presa.

O raio caeu á primeira hora da tarde deste venres, golpeando con forza a cheminea da casa, que acabou no chan xunto con parte da cuberta. A partir de aí, no interior moveuse por practicamente toda as estancias. Pero a peor parte levouna a cociña.

Luis estaba no interior da vivenda coa súa nai e dispoñíase a saír cando a forza eléctrica impactou contra o contador situado na entrada. Foi a porta a que nese momento o protexeu e impediu que o susto fose maior.

Na casa son moitos os danos ocasionados, pero a pegada do raio tamén se deixou sentir nos arredores da vivenda e mesmo algún veciño sufriu o corte de luz. Agora están pendentes da avaliación dos danos, e mentres teñen que pasar este días na casa dun familiar.

A porta da entrada da casa fixo de protección e conseguiu evitar un mal maior, pero hoxe, tres días despois, aínda seguen co susto no corpo e agardando unha solución para poder volver á súa vivenda.