Buscan un mozo que caeu ao Miño tras envorcar o seu caiac en Carballedo
Canda o desaparecido ía outro rapaz, un curmán, que conseguiu chegar a terra e pedir auxilio
Un helicóptero da Garda Civil localizou o caiac
Buscan un mozo no río Miño logo de caer á auga tras envorcar o caiac en que viaxaba canda outro rapaz, que logrou chegar a terra e pedir auxilio. Foi un particular o que contactou co 112 Galicia para indicar que un rapaz lle comunicara que tivera un accidente cun caiac, no cal viaxaba co seu primo. Dixo que o perdera de vista logo de envorcar preto do encoro dos Peares, na Carballeira, A Cova, no concello lucense de Carballedo.
🔴#AXEGAInforma da procura dun mozo no río Miño tras envorcar o kaiac no que viaxaban dous compañeiros.
— 112 Galicia (@112Galicia) March 30, 2026
📌 A Carballeira, A Cova, no concello lucense de Carballedo, preto do encoro nos Peares.
➡️ Activado dispositivo de busca.
🔗 https://t.co/vRDielNuCI pic.twitter.com/vcB3c3smk4
Con estes datos, desde o 112 Galicia activouse un operativo e mobilizouse o 061, Garda Civil, e bombeiros de concellos da contorna. Ademais, súmase á procura un dron e cámara térmica dos bombeiros de Ourense.
Segundo a información recibida pola Garda Civil, os mozos saíron co caiac do embarcadoiro dos Peares, subiron ao río e cando volvían tiveron o accidente.
Os Bombeiros de Chantada, unha vez no punto, comunicaron as dificultades que presenta o terreo, que é impracticable dende terra, a orografía é moi pendente e arriscada, polo que só ven viable o uso de medios acuáticos e aéreos para a busca e rescate.
Polo momento, un helicóptero da Garda Civil, que se sumou á busca, localizou o caiac. Os medios acuáticos continuaban a última hora da tarde buscando ao mozo.
Ademais, persoal do Grupo de Intervención Psicolóxica en Catástrofes e Emerxencias foi informado por se fose necesario intervir para atender os familiares do desaparecido.
