Un raio bota abaixo parte do teito dunha vivenda en Tomiño

No medio das fortes chuvias, un raio destrozou de madrugada unha vivenda unifamiliar no concello pontevedrés de Tomiño.

O estrondo espertou a propietaria ás seis da mañá.

Sentiu o lóstrego á vez que lle caía na cama un cacho do falso teito e cheiraba a queimado das chaves da luz.

Cando abriu o día comprobou a desfeita: o raio caeu na antena, atravesou o tellado, tirou coa cheminea e fixo varios boquetes nos muros e no interior da vivenda.

Aínda ten o susto no corpo pero nin ela nin o seu can sofren dano ningún.