Un pub de Pontevedra automatiza a venda de entradas con tarxeta

A nova máquina está instalada á porta do pub. O cliente pode escoller cantas consumicións quere coa súa entrada e pagar coa tarxeta, co móbil ou co reloxo. Recibirá un tícket que se entregará na barra. A idea e limitar o movemento de cartos en efectivo.

Na entrada seguirá unha persoa controlando os certificados covid e mesmo para algún pago en efectivo, se fose preciso. Esta medida vense sumar ao semáforo coa capacidade do local, que hai na porta, e aos medidores de CO₂. O sistema de barra continuará coma sempre.

O dono do pub, Iván Parada González, explica que despois da pandemia mudaron os hábitos de pago dos clientes. Agora, o 85 % das consumicións abónanse con medios electrónicos. 

Na aposta pola tecnoloxía segura, tamén instalaron unha pantalla led na barra para lembrar as medidas de seguridade ou indicar os prezos das consumicións, evitando as cartas tradicionais de papel.