Sanxenxo ordena o primeiro peche dun local de lecer nocturno por non conectarse ao sonómetro
Despois de exceder o prazo concedido aos establecementos e recibir varias denuncias veciñais por ruído, o Concello procedeu ao peche
Ten en marcha polo mesmo motivo outros expedientes similares a diferentes locais
O Concello de Sanxenxo dera un prazo aos negocios para conectar os seus equipamentos para ser controlados pola Policía Local (TVG-Arquivo)
O Concello de Sanxenxo realizou a primeira clausura temporal dun local de lecer nocturno en Portonovo por incumprir a obrigación de conectar o seu limitador de son ao sistema de control acústico municipal.
Segundo indicou o consistorio nun comunicado, a Policía Local dispón dunha plataforma para vixiar en tempo real os niveis de ruído e tomar as medidas pertinentes, pero para iso é necesario que os locais conecten os sonómetros e limitadores de volume.
Despois de exceder o prazo concedido aos establecementos e recibir varias denuncias veciñais por ruído, o Concello procedeu ao peche deste primeiro establecemento. Ademais, segundo avanzou, ten en marcha polo mesmo motivo outros expedientes similares a diferentes locais.
Así as cousas, cando o establecemento se conecte, a Policía Local ten dous meses para comprobar o cumprimento.
Denuncia por exceso de capacidade
Ademais, está en trámite unha denuncia a outro establecemento en Sanxenxo por exceso de capacidade. Unha infracción que se considera grave segundo a Lei de Espectáculos Públicos e Actividades Recreativas.
As multas oscilan dos 30.000 euros aos 600.000 euros, e mesmo poden comportar a clausura ou suspensión temporal do local ata por un ano.
