Un pianista de Coles en Oriente Medio
Luis Humberto, músico e aventureiro, sacou nos anos 70 a praza de pianista do Hilton de Teherán
Personalidades da época como Henri Kissinger, Aristóteles Onassis ou Sofia Loren escoitárono ao piano
Sentarse ao piano é para Luis Humberto abrir un torrente de imaxes, de recordos dunha vida itinerante coa música como única constante.
"O piano é a miña vida, o que me fixo viaxar e coñecer mundo".
Todo comezou en Coles, hai 76 anos. Naceu rodeado de música e escolleuna para a vida. Iniciouse profesionalmente en Mondariz, pero pronto deu o salto a Oriente Medio: "Eramos novos, de 20 anos, nunha España en branco e negro. Tiñamos ilusión por ver o descoñecido".
Empezaron por Beirut. Despois Abadán, Bagdad... No Hotel Hilton de Teherán sacou a praza de pianista. "Era unha cidade moderna e moi occidentalizada", explica.
Tocou para Liz Taylor... para Sofia Loren... Henry Kissinger ou Frank Sinatra.
"No Hilton, cando acababa de cear, Frank Sinatra viña alí comigo a cantar e eu acompañábao", recorda.
Tamén viviu momentos históricos. De Chipre fuxiu coa invasión turca, e cando marchou de Irán xa se empezaba a xerar a revolución islámica.
Trinta e cinco anos na Toxa
Recalou no Gran Hotel da Toxa, onde pasou a maior parte da súa vida laboral. Do traballo xa se xubilou, pero a música ségueo acompañando cada día.
