Un novo xeito de facer turismo en apartamentos flotantes
Están feitos en Galicia e permiten gozar do estilo de vida dos mariños, pero con todas as comodidades dunha vivenda convencional
Pasar unhas vacacións ou mesmo vivir todo o ano a bordo dun barco é algo bastante común en zonas do Mediterráneo, e noutros lugares do mundo, pero é unha novidade aquí.
No porto de Sanxenxo, acaba de atracar o Atlantis. Construído nun estaleiro do Porriño é un dos primeiros apartamentos flotantes de Galicia.
Estará, en breve, dispoñible para alugar por días, semanas, meses, ou mesmo por todo o ano se hai alguén disposto a ensaiar o estilo de vida dos mariños cando amarran. O buque non está destinado á navegación, pero móvese, navega para, por exemplo, baleirar as augas residuais.
O Atlantis poderá reservarse en redes e nas plataformas de alugueiro turístico.
