Un milleiro de postos animan unha Feira de Santos de Monterroso sen gando
A Xunta suspendeu todos os eventos con gando pola dematose nodular contaxiosa que afecta o vacún
Con máis de 800 anos de historia, a cita congrega máis de 20.000 visitantes cada primeiro de novembro
A Feira de Santos de Monterroso, unha das máis antigas e emblemáticas de Galicia, celébrase este sábado 1 de novembro sen mercado gandeiro para protexer os animais da dermatose nodular contaxiosa.
Malia a medida adoptada pola Xunta, que suspendeu todos os eventos con gando pola doenza vírica que afecta o vacún, o concello confirmou a participación de máis dun milleiro de expositores que ofrecen produtos de tempada e artesanía.
"O único que non vai ter actividade é o mercado de gando, pero o forte, o gordo da feira celebrarase exactamente igual", aseguraba esta semana o alcalde do municipio, Eloy Pérez.
Con máis de oito séculos de historia, a orixe desta feira remóntase ao século XIII. Grazas á súa importancia como motor comercial e cultural, continúa viva e cada ano recibe máis de 20.000 visitantes.
Extremar as medidas preventivas
Durante a súa visita á feira, a conselleira do Medio Rural, María José Gómez, recomendoulle aos gandeiros extremar as medidas preventivas coa dermatose nodular contaxiosa.
Segundo dixo, confía no posible futuro proceso de vacinación e non descarta que se tomen máis medidas en función da evolución da enfermidade.
