Un incendio calcina un alpendre en Quiroga
A cuberta colapsou coas lapas, que provocaron danos por valor de máis 15.000 euros
Do alpendre dunha vivenda da Ribeira, na parroquia quiroguesa do Hospital, só se manteñen en pé as paredes. O resto quedou arrasado polas lapas tras declararse un incendio. No interior da palleira gardábanse apeiros de labranza, cubas de madeira, unha carretilla ou unha bicicleta que pertencía a un veciño.
"Eu o único medio de locomoción que teño é a bici, porque vivo aí arriba nunha aldea. Agora vouna botar en falta, e menos mal que teño outra de reposto", sinala osé Alberto Álvarez, dono da bicicleta calcinada.
"En cousa de media hora, colapsou o teito e xa quedou todo así. E avisamos axiña", afirma Carlos Manuel Antoranz, esposo da dona do alpendre.
Ata o lugar desprazáronse os bombeiros do parque comarcal de Monforte e mais unha carroceta municipal de Quiroga, que estiveron a traballar durante unha hora en evitar que as lapas se propagasen a outras vivendas.
Tocante á orixe do lume, descoñécense as causas, pero o certo é que os fortes refachos de vento e a presenza de material altamente inflamable fixeron que o pendello ardese enseguida.
"Cando me dei de conta, saía fume de aquí e vimos que estaba xa o lousado ardendo. Debeu de ser do vento que había, que levantou algunha chispa ou que fose, e como aquí nada máis que tiñamos palla e moitas caixas de cartón, a cousa foi así", explica Carlos Manuel.
Os donos da palleira estiman que serán necesarios máis de 15.000 euros para poder arranxar o inmoble.
