Deteñen un home en Lugo por abusar sexualmente da súa neta menor de idade

O maxistrado do Xulgado de Instrución número 1 de Lugo, en funcións de garda, decretou a posta en liberdade con cargos dun home detido na capital lucense como sospeitoso de abusar sexualmente da súa neta, unha adolescente menor de idade.

A Fiscalía non solicitou o seu ingreso en prisión. Como medidas cautelares, o xuíz impúxolle a prohibición de aproximarse e de comunicarse coa vítima.

Está investigado por delitos continuados de abuso e agresión sexual, e por un delito de provocación sexual.

Aínda que por parte da Comisaría Provincial non se confirmou ningún extremo relacionado con este arresto, fontes próximas ao caso indicaron que a detención se produciu este mércores por parte de axentes da Unidade de Atención á Familia e Muller (UFAM) da Policía Nacional.

Tamén aclararon que a menor reside noutra cidade de Galicia, pero viu a Lugo a visitar ao seu avó.