Un grupo de encapuchados rouba nunha tenda de informática de Santiago
Os ladróns empregaron un coche para rebentar o escaparate do comercio e roubar nuns instantes teléfonos de alta gama e reloxos intelixentes
Un grupo de encapuchados perpetrou esta madrugada un roubo nunha tenda de produtos da marca Apple en Santiago, situada na Avenida de Barcelona, utilizando o método da alunizaxe, consistente en estrelar un vehículo de forma deliberada contra o escaparate para rompelo e acceder en cuestión de segundos.
Os feitos producíronse contra as cinco da madrugada, e de seguido desprazáronse ao lugar axentes da Policía Nacional alertados polos sistemas de seguridade do comercio, pero os ladróns xa se deran á fuga.
O botín subtraído aínda non foi cuantificado, segundo fontes da investigación, pero si se sabe que se levaron varios teléfonos de última xeración e reloxos intelixentes.
Neste establecemento xa roubaran o ano pasado, e outro de Ourense da mesma empresa sufriu un roubo semellante no ano 2023.
